نهار العيد قابلته غـزالٍ زايفٍ نبته=وكلمني وكلمته ورحـنا في خـرايطها
عليه العود دندوني – ياقدامي يامن دوني=يقـول الثوب هدوني تقول انه مهبّطها
وعليه العين هدّاجه – مايقدر يرفع حجاجه=وساعٍ فيهن دعاجه وبعد بالكحل ماغطها
وعليه من الشعرغدرا – ليامنه انحدر حدرا=مقاديمه على الصدرا وعلى الامـتان يبـسـطها
وعليه العنق ممغوطه - وزغـدٍ كنـه القوطه=دلوعه وشمحوطه ياحظ اللي يقـلّطها
وعليه الطول متساوي – لانيجيري ولاجاوي=عـودٍ بالحلا راوي وصوف الزين صافطها
وعليه من الدلع غنجه – تتل الروح من طنجه=لو شافوه الافرنجه تـسلم له خـرايطها
وعليه من الرخا شلقه – بلا كويه ولا فلقـه=فـمٍ كنـه الحِلقـه هـني اللي يـمشّـطها
عطيته رقم جوّالي – وقمت اضبّط عقالي=عسى يطرب لموالي وتـقـبلني وسايـطها
لزمني قاوي الهمه – مطوع لابسٍ عمِّـه=يـوم انـه رفـع كمـه يبي فالوجـه يـخْـبـطها
مسكت يديه ياقـوه – اكيـد مطـوع فتـوّه=تـوه فالغـدا تـوه قــدور الـضغـط ماسـطها
طلبته يغّفر الزلّه – وملتنا هـي الملّـه =وكـل انسـان لـه علّـه تعابـطه ويعابـطها
رحمني جعله الرحمه – عقب ماشافني فحّمه=وقال اشرد مع الزحمه وجيت الباب شاخطها
لقيت العسكري التالف – يقول الموتر مخالف=وانا في ذمتي حالـف قـسـيـمه لك بخططها
تغفلته ودقيت سلف – ابيه يبطّل من الحلف=انانيـه وقلة ولف تعبنا مـن تـسلطها
وفجأه دقت الساعه – صلاة الصبح فزّاعه=تنـادي حـزة الطاعـه على التنبيه ضابطها
وقمت اشوف من حولي – واعس يدَي ورجولي=هذا ماهوب معقولي انا شـكـلي ملخبطها
وطلعت امثل الجندي-بطل في فلمي الهندي=سوايـا الـرز والمنـدي لياجا الكبد يـضغطها